చంద్రయాన్-1 రికార్డులు బద్దలుగొట్టిన చంద్రయాన్-2

గతంలో పంపిన చంద్రయాన్-1 రికార్డులను తాజాగా పంపిన చంద్రయాన్-2 అధిగమించిందని భారత అంతరిక్ష పరిశోధన సంస్థ ఇస్రో ప్రకటించింది. చంద్రయాన్ 2 ప్రస్తుతం చంద్రుడి కక్ష్యలో ఉంది. మూడో చంద్ర కక్ష్య విన్యాసాన్ని విజయవంతంగా నిర్వహించినట్టు బుధవారమే పేర్కొన్న ఇస్రో .. అంతరిక్ష నౌకలో అన్నీ సవ్యంగా ఉన్నాయని గురువారం తెలిపింది.

 ప్రొపల్షన్ సిస్టంను ఉపయోగించి చంద్రయాన్ 2 అంతరిక్ష నౌకను విజయవంతంగా చంద్రుడి మూడో కక్ష్యలోకి ప్రవేశపెట్టినట్టు తెలిపింది. అంతరిక్ష నౌక నుంచి విక్రమ్ ల్యాండర్ వేరు పడడానికి ముందు మరో మూడు విన్యాసాలు నిర్వహించాల్సి ఉందని శాస్త్రవేత్తలు వివరించారు. సెప్టెంబరు 7న విక్రమ్ జాబిల్లిపై ల్యాండ్ కానుంది.